Itorero rya Potter’s Hand Ministries riyobowe n’umushumba Pastor Jimmy Muyango ryatashye ku mugaragaro inyubako y’urusengero rwubatswe mu gihe cy’imyaka 3, abizera baryo bishimira kongera guhurira hamwe nk’abana b’Imana bakaramya iyabahanze.
Abizera b’iri torero barimo abashumba, inzego za Leta, inshuti n’abandi bahuriye muri uyu muhango wo gushima Imana bataha inyubako nshya. Uyu muhango wabaye ku wa Gatandatu tariki ya 17 Kamena 2023, ku musozi wiswe Potter’s Hill, mu karere ka Kicukiro, mu Murenge wa Masaka, Akagali ka Cyimo, Umudugudu wa Cyimo.
PHM ni itorero rimaze imyaka igera kw’icumi rishinzwe.Iri ryageze kuri byinshi byatanze umusaruro birimo kuvuga ubutumwa mu gihugu no hanze yacyo, gutanga inyigisho ku bashakanye,gukumira amakimbirane aboneka mu ngo, kurwanya ihohoterwa rikorerwa abana, kunga imiryango igiye gusenyuka n’ibindi byinshi.
Uyu muhango wera wabonetsemo kuramya Imana hamwe na Potter’s Hand Worship hamwe n’itsinda ryavuye muri Urwego Bank,ndetse n’abizera bahimbawe baramya Imana ikora ibyo abantu batabasha.
Ubwo hadukaga icyorezo cya COVID-19, amwe mu matorero yarafunzwe,n’iri torero ryafunzwe muri ayo. Nyuma yo kwemerera zimwe mu nsengero zujuje ibisabwa,itorero rya PHM ryo ntiryemerewe kuko ritari ryujuje ibisabwa byose cyane cyane ko bateraniraga mu nyubako itariyabo.
Kuya 23 Nzeri 2020 ni bwo haje igitekerezo cyo kubaka uru rusengero ndetse ibikorwa by’ubwubatsi biratangira. Ubuyobozi bw’iritorero bwagize buti “Twizeye Imana ica inzira ahatari inzira, ikora no mu bihe bigoye”.
Kubwo gufashwa n’Imana, ndetse no kwitanga kwa benshi urusengero rwarubatswe ndetse rujyanye n’icyerekezo Leta yifuza.Uru rusengero rufite ubushobozi bwo kwakira abagera kuri 800.
Ku Cyumweru tariki ya 12 Werurwe 2023,abizera b’iri torero bagize amateraniro ya mbere mu nyubako nshya,bongera kwishimana n’abana b’Imana,kandi bahawe Uruhushya rwo gutangira gukoresha iyi nyubako.
Iri torero PHM rikorana n’inzego z’ibanze mu gufasha abatishoboye mu kubishurira ubwishingizi mu kwivuza(mutuelle de santé),basannye inzu z’abatishoboye bafatanije na Praise Christian Centre (PCC),bafashije abana bafite ubumuga,bafasha abana kwiga, kandi bafashije ishuri ry’abana b’inshuke (ECD) n’abandi.
Pastor Joel Sengoga uyobora itorero rya Divine Destiny Church, akaba n’umuyobozi wa FABACOR yashimiye ubufatanye bw’abizera b’iri torero n’izindi nzego zirimo iza Leta zatanze umusanzu wabo mu gikorwa cy’inyubako.
Senior Pastor Muyango Jimmy yashimye byimazeyo abizera b’iri torero bitanze uko bashoboye ngo bagere kuri byinshi birimo kubaka n’uru rusengero,kugeza rwuzuye.Yavuze ko umuntu adatungwa n’umutsima gusa ahubwo atungwa n’ijambo ry’Imana.
Umugabura w’ijambo ry’Imana Rev Dr Mugisha Charles yikije ku magambo meza ahumuriza imitima ya benshi bari bitabiriye,ndetse yibutsa abantu ko nta sengesho Imana idasubiza,kabone nubwo ryatinda gusubizwa ariko ihora yiteguye kumva abana bayo bayitakira,bayisenga,bayisaba amanywa n’ijoro.
Rev Pastor Dr Charles ni umuyobozi w’Itorero New Life Bible Church yagize ati“ Nta sengesho Imana idasubiza.Imana yacu,ishoboye gusubiza amasengesho yacu, ishoboye gukiza,imana yacu igaburira abashonje badafite icyizere cy’ubuzima”.
Yashimye Imana kubw’ibitangaza byayo ndetse agaruka ku kamaro k’urusengero,avuga ko atarurwo gusengeramo gusa,ahubwo ko ari ahantu umubiri n’umutima bitunganyirizwa umuntu agasigara yera.
Madame Kazaire Judith umuyobozi muri RGB yashimiye iri torero kubwo kubahiriza amabwiriza ya Leta. Yabashimiye ko bubatse urusengero rujyanye n’icyerekezo Igihugu cyifuza, ndetse abashimira umuhati wabo mu gushyigikira umurimo w’Imana.
Potter’s Hand Ministries bujuje urusengero rw’icyitegererezo
Pastor Muyango Jimmy wa Potter’s Hand Ministries hamwe na Rev Mugisha Charles wa New Life Bible Church
Potter’s Hand Ministries yatashye urusengero rwakira abarenga 800
