Mu irushanwa rya Diva Awards 2025 ryabereye muri Zaria Court ku wa 30 Ugushyingo 2025, abahanzi b’indirimbo zo kuramya no guhimbaza Imana, Vestine na Dorcas, begukanye igihembo cy’Abaramyi b’umwaka.
Iki gihembo Vestine na Dorcas begukanye, bagitwaye abo bari bagihataniye, abo bakaba abahanzi bakomeye mu ndirimbo zo kuramya no guhimbaza Imana barimo Israel Mbonyi, Josh Ishimwe, Chryso Ndasingwa ndetse na Alarm Ministries.
Uyu mwaka, Vestine na Dorcas bakoze indirimbo zasakaye cyane ku mbuga nkoranyambaga n’imiyoboro itandukanye.
Indirimbo yabo “Yebo [Nitawale]” imaze kurebwa na miriyoni zirenga 25, mu gihe “Emmanuel” na yo imaze kurebwa na 8.9 miriyoni mu gihe cy’amezi 4 ashize. Banakoze ibitaramo bizenguruka Canada, ibyabagize abaramyi baciye uduhigo muri uyu mwaka.
Diva Awards 2025 yari ibaye ku nshuro yayo ya gatatu, ikaba yaragutse uyu mwaka ikinjizamo ibyiciro bitandukanye birimo: Umuraperi w’umwaka, Umuhanzi wa gakondo, Indirimbo yo kuramya no guhimbaza Imana, Producer w’umwaka, Indirimbo y’umwaka, Collabo y’umwaka, Umuhanzi mushya wigaragaje muri 2025, ndetse n’Abavanga imiziki (DJs) beza kurusha abandi.
Abakunzi ba Vestine na Dorcas ni bo bashimirwa cyane mu kubashyigikira, ibyatumye begukana iki gihembo cy’icyubahiro mu muziki w’iyobokamana.
Vestine na Dorcas begukanye igihembo cy’abaramyi b’umwaka muri Diva Awards 2025
