NFL cyangwa National Football League, ni shampiyona nkuru y’umupira w’amaguru wa Amerika (American Football) muri Leta Zunze Ubumwe za Amerika.

Nubwo bamenyekana kubera impano bafite mu kibuga, bo bavuga ko ubuzima bwabo bushingiye mbere na mbere ku kwizera Imana.

Bamwe mu bakinnyi ba NFL bazwiho gukunda Yesu no kubigaragaza mu ruhame. Muri bo harimo Dak Prescott wa Dallas Cowboys, Patrick Mahomes wa Kansas City Chiefs, Kirk Cousins, Derek Carr, Trevor Lawrence, Carson Wentz ndetse na Christian McCaffrey.

Dak Prescott yavuze ko nyuma yo guhura n’ibigeragezo bikomeye birimo igikomere gikomeye ndetse n’urupfu rw’abo mu muryango we, ukwizera kwe kwarushijeho gukomera. Yagize ati: "Ukwizera kwanjye kwikubye kabiri kurusha mbere, kandi ndashimira Imana kuko ari Umukiza wanjye kandi ni yo iyobora ubuzima bwanjye."

Patrick Mahomes na we yavuze ko kwizera Imana ari byo bimufasha gukomeza kwicisha bugufi nubwo yageze ku rwego rwo hejuru muri siporo. Yavuze ko mbere ya buri mukino afata umwanya wo gusenga no gushimira Imana ku mahirwe yahawe.

Jason Wright wahoze ayobora ikipe ya Washington Commanders yavuze ko Kristo ari we utanga umutekano nyakuri mu buzima. Yagize ati: "Niba ushaka umwirondoro nyawo n’amahoro arambye, Kristo ni we ubiguha."

Si aba gusa. Raporo zitandukanye zigaragaza ko abakinnyi benshi ba NFL nka Kirk Cousins, Lamar Jackson, C.J. Stroud n’abandi bakunze kuvuga ku kwizera kwabo no gushimira Yesu mu biganiro n’itangazamakuru.

Aba bakinnyi bavuga ko nubwo gutsinda imikino ari ingenzi, intego yabo ikomeye ari ukwereka abantu urukundo rwa Yesu no gukoresha ubwamamare bafite mu kwamamaza ubutumwa bwiza.

Sc. (ChurchLeaders)